JAALIYADAHA SOOMAALIDA OGAADEENYA EE DEGAN GOBOLADA GALBEEDKA DHEXE EE DALKA MARAYKANKA

CAMBAARAYN FALXUMADI MAAMULKA PUNTLAND
Tar. 4/27/2008

Dhamaan Odayada, Cuqaashta; Salaadiinta, Ugaasyada, Aqoonyahanka, Siiyaasiinta, Culimada diinta, iyo ururada bulshada gaar ahaan haweenka iyo dhalinyarada ku nool Gobolada Galbeedka Dhexe (Mid-west) ee Dalka Maraykanka ayaa camabaarayn kulul waxay u soo jeedinayaan Maamul Goboleedka Puntland. Cambaarayntan oo ay sababteedu tahay dhacdadii foosha xumeyd  een laga fiirsan oo bishan Abril 22, 2008 ay ku afduubeen ciidanka sirdoonka Puntland iyo kuwa Tigreega oo uu horkacayey Wasiirka Maaliyada Puntland Maxamed Cabdi Yuusuf (Gaagaab) iyagoo garba duubana ay gacanta u galiyeen Gumaysatada Itoobiya ee ay Xukunto Qowlaysatada Tigreega. Xubnaha Gumaysiga Itoobiya gacanta loo galiyey kana tirsan Golaha Dhexe ee Jabhada Wadaniga Xoraynta Ogaadeenya waxay kala ahaayeen;

Waxaa wax laga xumaado ah in Maamul sheeganaya magac Soomaali iyo mid Islaam inuu dad Soomaali ah oo Islaam ah intay garba duub u xidheen gacanta u galiyeen cadawgi ay Soomaali dagaalka kula jirtay shan- boqol oo sano welina ay kula jirto. Waxaa wax laga xumaado ah inuu maamulkii Puntland uu ka door biday walaalnimadii Islaanimadii, iyo dhaqanki Soomaaliyeed raali galinta Xabashida Cadawga ah.
Jaaliyadaha Soomaalida Ogaadeenya ee degan gobolada kor ku xusan waxay Shacbiga Reer Puntland ka codsanayaan inay si ficil iyo afba ah u muujiyaan dareenkooda ku wajahan falkan cadawnimada ah ee uu ku kacay Maamulka oo adeegsanaya magacooda iyo astaantooda gaarka ah.
Falkan wuxuu halis galinayaa xidhiidhkii wanaagsanaa ee labada shacab. Falkan iyo ficilkan oo ah Guumaysi u adeegid iyadoo uu Maamulka Puntland adeegsanayo dhaqaalihii ay bixiyeen shacbiga Puntland ayaa ah mid dhagar iyo dakano u soo jiidaya Shacbiga Puntland.
Maamulka Puntland wuxuu muujiyey inuu raali ka yahay qaybna ka noqday xoogaga in la guumaysto, la laayo, la xidh-xidho, la dhiibo, lana dulaysto shacbiga Soomaalida Ogaadeenya. Falkan wuxuu markhaati ka yahay in markuu shacbiga Soomaalida Ogaadeenya uu khatar iyo khalkhal galiyey guumaysatada Itoobiya inuu Maamulka Puntland uu gurmad iyo is garab taag u muujiyey Guumaysatada Itoobiya. Waxaa xaqiiq ah falkan Maamulka Puntland uu ku talaabsaday inuusan marnaba joojinayn Halganka Xornimada doonka ah ee Shacbiga Soomaalida Ogaadeenya ay ugu jiraan inay duliga Xabshida ay iskaga qaadaan.
Iyadoo aan aad u soo dhawaynayno hadaladi xilkasnimada ahaa ee ka soo yeedhay wax garadka iyo odayaasha Puntland, hadana waxaan rajaynaynaa in hadalkaas ficil loo badalo. Isla mar ahaantaas waxaan u soo jeedinaynaa; Shacbiga Puntland, Cuqaashiisa, Isamadiisa, Culumada, Waxgaradkiisa, Aqoonyahankiisa, iyo Siyaasiintiisa inay yihiin kuwa uu xilku ka saran yahay qabashada Maamulkooda iyo ka hortigida falalka magacooda iyo fadligooda dulmiga loogu gaysanayo dadka walaalahooda ee Gumaysiga loo garba duubayo.
Iyagoo ku hadlaya Magaca Jaaliyadaha Soomaalida Ogaadeenya ee Gobolada Galbeedka Dhexe ee Dalka Maraykanka waxaa Bayaankan Cambaaraynta ah soo saaray dadkan magacyadoodu hoos ku taxanyihiin: